Үржар ауданы Таскескен ауылында абаттандыру жұмыстары қарқынды. Қазір ауылда спорт модулінің құрылысы аяқталуға жақын және мәдениет үйі жөнделді. Сонымен қатар, 8 тұрғын үй құрылысы басталған. Арнамыздың түсірілім тобы Таскескен ауылында болып қайтты.
Үржар ауданы Таскескен ауылындағы спорт модулінің құрылысы 2023 жылдың мамыр айында басталған. Нысан бір ауысымда 28 адамды қабылдай алады. Жоба құны 525 млн теңге. Спорт модулінің басты бағыты жеңіл атлетика және күрес залы. Кешен 2 бөліктен тұрады. Біріншісі спорт залы, екінішісі әкімшілік блок. Спорттық ойындарға керекті заманауи құрал-жабдықтармен жабдықталған. Мұнда жаттығу залы, медициналық кабинет, киім ауыстыратын, жуынатын бөлмелер бар. Аумақта футбол алаңы мен автотұрақ та қарастырылған. Учаске шебері қажетті материалдар уақытында әкелініп, жұмыс жоспар бойынша жүргізілгенін жеткізді. Спорт модулі биылғы жылы тамыз айында пайдалануға берілмек. Осындай игі істерге ауыл тұрғындары дән риза.
БАҚЫТЖАМАЛ БИДОЛАҚЫЗЫ – АУЫЛ ТҰРҒЫНЫ
Бұл мәдениет үйі, спорт модулі ауылға жастардың шоғырландуырудың бірден бір амалы деп есептеймін. Ауылға жастар сонда көбірек келеді. Ауыл тіршілігімен олар да етене байланысып, ауылда еңбек етуге оларға да барлық мүмкіндікті жасау керек деп ойлаймын.
РАХЫМ ЗИЯДАНОВ – АУЫЛ ТҰРҒЫНЫ
Былтырдан бері ауылымызда 1 жылдан асты спорт кешенінің құрылысы басталды. Көптен бері ауылымызға осындай спорт кешені керек еді. Көріп жатырмыз сапасы өте жақсы. Жақсы салынуда. Және де былтыр ауылымызда мәдениет үйіне де күрделі жөндеу жұмыстары жасалды. Ол ауыл үшін үлкен мәртебе. Ауыл үшін үлкен жақсы. Ауылдың жастарына бос уақыттарын тиімді пайдалануға үлкен көмегін береді деген үміттемін.
Сондай-ақ, ауылда мамыр айында 8 тұрғын-үйдің құрылысы басталған. Үй кілттері тұрғын үй кезегінде тұрған әлеуметтік осал отбасылар және көпбалалы аналарға қыркүйек айында салтанатты түрде табысталады. Екі пәтерлі тұрғын үйдің жалпы ауданы шамамен 150 шаршы метрді құрайды. Ауылда сәулеті келіскен жаңа тұрғын үйлердің бой көтеруі ауыл көркінің артуына айтарлықтай септігін тигізуде. Жоба бойынша бөлмелері жарық, әрі кең 3 бөлмелі үйлер. Бұған қоса, үйлерге су тартылып, электр желілері орнатылады.
АЙДЫН ҚОЖАЕВ – ҚОҢЫРШӘУЛІ АУЫЛДЫҚ ОКРУГІНІҢ ӘКІМІ
Таскескен ауылы тоғыз жолдың торабында тұрған үлкен бұрынғы аудан орталығы. Қазіргі кезде әлеуметтік-экономикалық жағынан қарқынды дамуда. Олай дейтініміз, «Ауыл-ел бесігі» бағдарламасы аясында былтырғы жылы мәдениет үйіміз күрделі жөндеуден өткен. Биылғы жылы тамыз айында жастарға арналған спорт модуліміз қолданысқа берілетін болады. Болашақта енді 5 көшеміз қалған болатын бұрын «Ақбұлақ» бағдарламасы бойынша ауыз сумен қамтамасыз ету. Биылғы жылы жобалық-сметалық бағдарламасы жасалған. Келесі жылы осы жұмыстар жалғасын табатын болады.
Таскескен ауылында сыйымдылығы 55 млн текше метр су жинайтын Қарақол су қоймасының құрылысы кезінде басталып, аяқсыз қалған болатын. Алдағы жылдары оның құрылысы қайта жалғаспақ. Ауылдың жолдары да жөнделуде. 2023 жылы 5 көшеге асфальт, 1 көшеге құм төселді. Ауыз су, жарық толық тартылған.
АСЛАН ЕРТІСБАЕВ