Абай атындағы қазақ музыкалық-драма театрына - 90 жыл. Киелі сахнада осы уақыт аралығында 400-ге жуық қойылым көрсетіліп, оны 80 миллион көрермен тамашалаған. Мерейтойға орай Әлихан Бөкейхан университетінде «Абай театры тарих толқынында» атты республикалық ғылыми-тәжірибелік конференция өтті. Мерейтойға арналған басқосуда театртанушылар мен Абайтанушы ғалымдар баяндамалар жасады. Жиналғандар Абай театрының бай тарихи мұрасы мен оның ұлттық мәдениеттегі орны жайында жан-жақты пікір алмасты. «Мұхтар Әуезовтің ұлт театры мен драматургиясы», «Қазақстандағы театр өнерінің қалыптасуы – Абай театрының рөлі», «Бүгінгі сахна өнеріндегі Абай бейнесі» тақырыптарындағы баяндамалар тыңдаушылардың назарын аударды. Сондай-ақ, конференцияда «Тарихы терең театр» атты кітаптың тұсауы кесілді. Бұл еңбек Абай театрының қалыптасу мен даму жолын, оның қазақ өнері мен мәдениетіндегі рөлін терең айқындайды.
Дос Құбаш – Театрдың көркемдік жетекшісі
Көптеген мерекелік іс-шаралар, ғылыми-тәжірибелік конференция, салтанатты кештер сонымен қатар Еңлік-Кебек арнайы Абай атамыздың театрының 90 жылдығына қойылған қойылым болатын. Қазақтың қарап отырсаңыздар тарихы, театр тарихы осы Абайдың театрынан басталған деп айтсақ артық айтпағандығымыз болар. Сондықтан бұл жалпы өнер сүйер қауымның, жалпы халықтың мерекесі деп ойлаймыз, тойлаймыз.
Жиында Мұхтар Әуезов атындағы Әдебиет және өнер институты Семей филиалының директоры Бауыржан Ердембеков, Әлихан Бөкейхан университетінің проректоры Айрат Базенов пен бірқатар қоғам қайраткерлері құттықтау сөз сөйледі.
Айрат Базенов – Әлихан Бөкейхан университетінің проректоры
Театрдың киім ілгіш кіреберісінен бастап қызмет жасап тұрған бас режиссерге дейінгі аралықтағы барлық қызметкерлердің жүрегінде өнерге деген, театрға деген үлкен махаббат бар. Біз көрермен ретінде, біз театрдың қалаушылары ретінде сол жүректерді аялай білейік. Барлықтарыңызды театрдың 90 жылдық мерекесімен құттықтаймын.
Абай атындағы қазақ музыкалық - драма театрында 30 жыл қызмет етіп жүрген әртіс Сұлушаш Нүкенқызының да өнер ордасына айтар алғысы шексіз. Әртістер әр қойылымға тыңғылықты дайындалып, бар уақытын киелі шаңырақта өткізеді. Өздеріне берілген рөлді жоғары деңгейде алып шығып, көрермен қошеметіне бөлену қажырлы еңбектің нәтижесі.
Сұлушаш Нүкенқызы – Театр әртісі
Бүкіл әріптестерімді, бүкіл актер, актрисаларды, үлкен апай, ағаларымды, жастарды осы біздің театрымыздың 90 жылдығымен құттықтаймын. Шығармашылық табыс тілеймін. Әрқашан патша көңілді көрерменнің көңілінен шығып, театрымыз 100 жылдығын тойлап, жақсы-жақсы көрерменге беретін репертуарымызда спектакльдер туса екен деп ойлаймын. Сондай қуанышқа әрқашан да қазағымыздың көрерменімен бірге жете берсек деген өзімнің ойым бар.
Сонымен қатар, мерейтойға орай «Ойқұдықта маздаған театр» атты деректі фильм түсірілген. Ол театрдың 90 жылдық тарихындағы маңызды кезеңдерді, белгілі өнер қайраткерлерінің еңбегін және театрдың қазақ өнеріндегі орнын көрерменге тереңірек таныстырады.